[Commentarius]

Eugenianus, Martyr Augustoduni in Gallia (S.)

S. Evgenianvm hodie refert Martyrologium Romanum, Vsuardus, Bellinus, Maurolycus, Martyrol. Germanic. MS. Florarium, Galesinius, qui Augustoduni in Gallia martyrium subiisse in Notationibus testatur, vti & Petrus de Natalibus lib. 11. cap. vltimo, num.29. sed hic V. ID. Ianuar. eius memorat Natalem, Antiquum MS. Monasterij S. Martini Treuiris: VI. ID. In Augustoduno Eugenij Episcopi & Martyris. Idem habet MS. S. Mariæ Vltraiecti. Nullum in catalogo Episcoporum Eugenianum vel Eugenium reperio, nisi forte inter Martyrium & S. Reticium sederit, nam deesse aliquot Episcoporum nomina suspicatur Claudius Robertius. VVandelbertus:

Iduum post sexto Eugeniano vota feruntur. Dubitauimus an non fortaßis idem esset qui Egemonius, de quo mox agemus. Sed eruditißimus Andreas Saussaius vt diuersos celebrat; atque Eugenianum quidem hoc elogio: Augustoduni Æduorum S. Eugeniani Martyris in strenua concertatione pro fidei testimonio laureati.