Svb Maximiano.

[Commentarius]

Domno, Martyr Bergomi (S.)

Ex Rvffino.

[1] Bergomi XVI. Iulij S. Domnio colitur. Eius nepos Domno fuit, idemq; auitæ heres magnanimitatis & gloriæ, frater S. Eusebiæ Virginis & Martyris, quæ XXIX. [S. Domno nepos S. Domnionis.] Octobris celebratur. Hunc V. Ianuarij passum ita celebrat Galesinius: Bergomi S. Domnionis Martyris, qui Maximino Imperatore pro Christi fide cruciatibus affectus, demum constantissime palmam Martyrij tulit. Citat Ecclesiæ Bergomensis monumenta. Ferrarius in Generali catalogo Sanctorum: Bergomi in Gallia Cisalpina S. Domnonis Martyris sub Maximiano. Idem in Catalogo Sanctorum Italiæ vitæ illius compendium refert, traditque ad eius auiq; commune sepulchrum Ecclesiam nunc S. Andreæ stare. Domnonis certamen breuiter complexus est Ioannes Antonius Guarnerius in libro de SS. Bergomensibus, ita scribens:

[2] [Acta S. Domnonis.] Domno Domneonis nepos auitos mores & disciplinam imitatus, compositis suis rebus, Eusebiaque sorore herede instituta, in conspectu Præsidis, quem Maximianus ad inspiciendas res Bergomates miserat, se Christianum esse, præsenti animo professus est: idcirco statim in carcerem coniicitur. [Ex prunis corona.] Paullo post cum eductus esset, ardentibusque prunis in caput iniectis torreretur, non modo non questus est, sed immortales Deo gratias egit, qui occasionem cælestis coronæ adipiscendæ obtulisset. Virtutis eius admiratione Consiliarius, [Consiliariū Præsidis conuertit.] qui Præsidis erat intimus, ad Christi fidem conuersus est. Ipse cum diutissime acerbissimis tormentis excruciatus esset, & ludibrio habitus, tandem extra portam necatus est, & laurea triumphali coronatus cælum ascendit: eius corpus in aui sepulchro repositum est Nonis Ianuarij, anno CCC. VII.