Circa An. Chr. CCLVIII.

[Commentarius]

Florentius, Episcopus Viennensis Martyr (S.)

[1] [S. Florentius Episc. Viennen. in exilium missus:] Sanctvs Florentius Præsul Viennensis IX. tempora Gordiani, Philippi, Decij, Galli, & Volusiani decucurrit: quando Nouatus B. Cypriani Presbyter Romam veniens, Nouatianam hæresim condidit. Anniuersaria eius dies est III. Non. Ianuar. quando post exilium mortem pro Christo pertulit. Ita Bibliotheca Floriacensis a Ioanne Boscio edita, & Ioannes Chenu.

[2] Claudius Robertus, Martyrologium Vsuardi Coloniæ editum auctius anno 1490. & 1521. Beda, Molanus in Addit. ad Vsuard. Martyrologium Germanicum, Ado, aliique, S. Florentium octauum Viennensis vrbis Episcopum scribunt fuisse. Credo quod Desiderium & Dionysium confundant. MS. Bedæ Martyrologium Bauaricum: Eodem die S. Florentij Iuuennensis (lege Viennensis) Episcopi & Martyris VII. eiusdem vrbis.

[3] [Coronatur martyrio.] Martyrologium Romanum: Viennæ in Galliis S. Florentij Episcopi, qui tempore Gallieni Imperatoris in exilium relegatus, illic martyrium consummauit. Eius præter citatos meminerunt MS. Florarium Sanctorum, & Galesinius. Martyrologium S. Hieronymi: Viennæ, depositio Florentij. De eo Matthæus VVestmonasteriensis in Floribus historiarum: Anno gratiæ 241. Florentius Viennensis Episcopus vita & doctrina claruit. [Doctrina clarus.] Mansit autem vsque ad Gallieni & Volusiani imperium, exulque martyrium compleuit.

[4] Notkerus eum II. Ianuarij refert, his verbis: Viennæ depositio B. Florentij Episcopi.