Circiter an. Christ. CCLXII.

[Commentarius]

XL Milites Martyres Romae via Lauicana (SS.)

Ex variis.

[1] Qvadragenarivs numerus, inquit S. Augustinus tr. 17. in Ioannem, sacratus nobis in quadam perfectione commendatur. Quare cum alia hoc numero sancta sunt olim, tum sæpius Christi milites laureā quadrageni retulere; vt qui IX. Martij Sebastæ in Armenia, & qui XIII. Ian. Romæ. De his Vsuardus, Martyrol. Roman. Bellinus, Maurolycus, aliiq;: Romæ via Lauicana coronæ sanctorum militum XL. quas sub Gallieno Imperatore pro confessione veræ fidei percipere meruerunt. [Horum M M. natalis.] De iisdem vetus Romanum, Beda, Ado: Romæ via Lauicana coronæ militum XL. sub Gallieno Imperatore.

[2] Notkerus, & Bedæ MS. Bauaricum ita habet: Romæ via Lauicana Secundinæ, Coronæ, & militum XL. sub Gallieno Imperatore. MS. Martyrol S. Hieronymi: Romæ Secundi. Via Lauiana coronæ militum XV. & alibi Quosquonio, [Iidem ambigue relati cum aliis.] Enonis. MS. Hibernicum: Coronæ, Serdi, & aliorum XXV. MS. Florarium: Romæ via Lauicana coronæ militum XL. quas sub Galieno Imperatore pro confessione veræ fidei percipere meruerunt anno salutis 263. persecutionis vero octauæ anno quinto. Deinde interiectis aliorum Sanctorum nominibus, Romæ passio S. Quirionis & aliorum numero XL. sub Galieno Imperatore anno salutis 263. anno octauæ persecutionis quinto. Vnde ambigi potest, 1. an Secundus, siue Secundina, aut Secundinus, sodalis fuerit & consors martyrij illorum XL. 2. an non Corona nomen sit proprium. 3. an Romæ, vel iuxta Romam paßi sint Quirio & Eno. 4.an bis XL. fuerint. Dum aliud innotescat; Secundum seiungemus; Enonem itē & Quirionem: coronam, cum plurimis Martyrologiis citatis, appellatiue sumemus: secundam quadragenariam turmam omittemus.

[3] De mortis genere nihil ab antiquis traditur. At Galesinius ita scribit: Romæ via Lauicana sanctorum XL. Martyrum, [Mortis genus.] qui Galieno Imperatore ob Christianæ fidei confessionem securi percussi sunt. Eadem fere Petrus de Natalibus lib. 2. cap. 72. Quadraginta milites ex temporali tirocinio ad Christi militiam transierunt. Qui omnes Romæ via Lauicana sub Imperatore Galieno pro confessione fidei decollati, coronas martyrij a Domino percipere meruerunt, Idibus Ianua. vt dicit Ado.

[4] [Tempus martyrij.] Tempus cædis eorum iam diximus a MS. Florarij Auctore statui annum Christi 263. qui erat Gallieni 10. non quintus octauæ persecutionis, sed potius ab inhibita atroci illa Valeriani persecutione, quæ inter decem octaua est, tertius. At Martyrologium Germanicum anno 260. occisos habet. Verisimile est post captum Valerianum id contigisse, cum absolute dicantur sub Gallieno coronati. Captus est autem Valerianus a Persis anno 260. Quo tēpore Gallienus (vt inquit Orosius lib. 7. c. 22.) tam claro Dei iudicio territus, tamque misero collegæ permotus exemplo, pacem Ecclesiis trepida satisfactione restituit. Idemq; Eusebius testatur lib. 7. cap. 12. vbi rescriptum Gallieni recitat, quo iubebat loca religiosa olim Christianis adempta restitui, vetabatq; iis negotium faceßi. Verum illæ Sanctorum interea cædes, præter eius sententiam Præsidum improbitate perpetratæ sunt. Agit de hiscerebus Baronius in Notis ad Martyrologium & tom. 2. Annalium, an. 262. n. 76. & seqq. & Galesinius in Notis ad Martyrologium, & alij.