Svb Ivliano.

[Commentarius]

Basilius, Ancyranus Martyr Caesareae in Cappadocia (S.)

[1] Basilivs Ancyranæ Ecclesiæ Presbyter, martyrio sub Iuliano apostata coronatus, [Duo Basilij Ancyrani Martyres.] celebratur XXII. Martij. Alius ei cognominis, eiusdemq; gloriæ particeps, sed laicus, sub eodē tyranno isthic Basilius vixit, cuius II. Ianuarij natalis agitur. De hoc Ferrarius in generali catalogo Sanctorum: Cæsareæ Cappadociæ, S. Basilij Martyris sub Iuliano apostata. Menologium Græcorum: [Vnus Cæsareæ passus.] Natalis sancti Martyris Basilij ex vrbe Ancyra, qui Cæsareæ, Imperatore impio Iuliano, Præside Saturnino, passus est.

[2] Martyrologium Gallobelgicum hoc die Basilium Presbyterum refert, omittitq; XXII. Martij. Plenius huius non Presbyteri agonem narrant Menæa:

[3] Hic impio Iuliano rerum potiente, Ancyræ natus, dum Christum & coleret & prædicaret, comprehensus * Taruilo Præsidi sistitur: apud quem cum Christum libera voce profiteretur, suspensus crudeliter laceratur: dein Ancyra Constantinopolim ductus, iterum ferro carpitur, adeoque distenditur, vti manuum pedumque compages diductæ soluerentur: [Dire cruciatus Cōstantinopoli.] tum loris cæditur, & candenti ferro vstulatur, & compungitur. Cumque omnia generose exantlaret, a Deo vicissim compensationem gratiarum accepit. Nam in ardentem caminum coniectus, per preces stupendum in modum illæsus permansit. Denique vinctus Cæsaream abductus, [Cæsareæ bestiis obiectus.] & a Prætore ad feras damnatus, leænæque obiectus, lauream martyrij occumbens reportauit. Sacras porro illius reliquias ex cognatis & familiaribus quidam studiose collectas & vnguentis delibutas, linteisque inuolutas, [Templum ei ædificatum.] debita cum veneratione illustri loco reposuere: ac demum ad earum cultum templum (quod Martyrium appellabant) condiderunt. Eadem fere Galesinius.

[Annotatum]

* Rader. Trāquillo, imo Trāquillino, vel potius Saturnino.