Circa ann. CDLXXV.

[Commentarius]

Dominica vel Domnica (S.)
Aemylianus Confessor (S.)
Georgius Chozebites (S.)

[1] Dominicam, siue Domnicam, ceteris Latinorum fastis ignotam, vti & Georgium Chozebiten, & Æmilianum, in Addit. ad Vsuardum retulit Molanus, his verbis: Die octaua sanctæ Matris Dominicæ: & sanctorum Patrum Georgij Chozebisti, & Æmiliani Confessoris. De iis Græcorum Menæa. S. P. N. Georgij Chozebitæ, & S.M.N. Domnicæ, & Æmiliani Confessoris.

[2] De Domnica deinde ista commemorant eadem Menæa: Vixit hæc Theodosij Magni imperio, prouixitque vsque ad Leonem & Zenonem Augustos. [Vita Dominicæ, ex Menæis.] Carthagine in Africa nata, ex occasione quadam cum quatuor virginibus Constantinopolim venit. Nectarius ibi tum Archiepiscopus ex diuina reuelatione illas suscepit, & salutari baptismatis vnda tinxit. Veneranda porro Domnica solitariam vitam complexa, & virilibus exercita laboribus, ad summum virtutis culmen prouecta, a Deo multis admirandis operibus dignata & illustrata est, multisque, quæ euentura erant, vaticiniis editis, ad Dominum migrauit. Hactenus Menæa. Imperarunt qui hic nominantur Imperatores, Theodosius Magnus a 16. Ianuarij, 379. vsque ad 17. Ianuarij, 395. Leo Thrax a 7. Februarij, 457. vsque ad initium anni 474. Zeno a mense Februar. an.474. vsque ad an. 491. Nectarius an. 381. creatus Constantinopolitanus Episcopus, sedit vsque ad 27. Septemb.397. coliturq; a Græcis XI. Octobr.

[3] Domnicam celebrat quoque Menologium Christophori Proconsulis Mitylenæi, & epitome Maximi Cytheræi. Tres simul recenset Calendarium Græcorum a Genebrardo editum his verbis: Domneca. Georgius Chozebites. Æmylianus Confessor. Eorumdem meminit Græcorum Horologium: Sanctæ Matris nostræ Domnice, & SS. PP. NN. Georgij Chozebitæ, & Æmyliani Confessoris.