Ex Menæis Græcorum.

Circa an. Chr. DCCCXX.

[Commentarius]

Gregorius, Acritensis monachus in Graecia (S.)

Ex Menæis Græcorvm.

[1] Ignotvs hic fastis Latinorum, ita celebratur in Græcorū Menæis: Traxit hic genus ex nobilissima Cretensium insula, religiosissimis parentibus Theophane & Iuliana ortus. [S. Gregorij patria & parentes. Pecora pascit.] Cumque haud parum temporis litterarum studiis impendisset, iussus est a parentibus pecus pascere: sed ille iam olim cælesti desiderio incensus, relicta patria, * Seleuciam se contulit, & inibi non exiguo tempore, [Patriam relinquit.] modico pane & aqua vitam tolerauit. Sexto autem & vigesimo ætatis anno, (qua tempestate ** Leo Imperator sacrarum imaginum hostis & euersor vitam abrupit, & Catholica religio respirauit, suæque libertati est reddita) Hierosolymam profectus, [Abit Hierosolymā.] locaque sacra cum ingenti affectu veneratus, quam multa & grauia, cum ab Saracenis, tum Iudæis, [Multa patitur.] totis annis duodecim perpessus sit, litteris tradi non potest ab eo qui epitomas dumtaxat & breuitatem sectatur.

[2] Dein inde discedens, se Constantinopolim contulit: vbi sumpto *** Angelico habitu, corpusculum suum abstinentia & ieiunio domuit. Postquam autem extincto **** Stauratio ***** Michael imperium tenuit, [Fit Monachus.] & ****** S. Nicephorus Ecclesiæ gubernacula tractauit, missus est ******* Michael Confessor, ******** Synadorum Episcopus Romam ad sanctissimum ********* Pontificem. Hic Constantinopoli cum B. Gregorio collocutus, secum illum, cum Roma rediisset, ad sanctissimum cœnobium, quod est in ********** Acrita, duxit, illicque religiosis viris adiunxit: vbi vnica contentus tunica, sine calceamentis, in storea ex iunco contexta somnum cepit, & post biduum aut triduum aliquid panis & aquæ libauit, [Austerissime viuit.] vel gustauit potius.

[3] Tum in altissimam fossam descendit, *********** ibique turbatum & miserabilem Ecclesiarum statum multis lacrymis longo tempore defleuit. Ex qua rursus emersus, angustissima se cella conclusit, vnica pelle tectus, dolium, quod in horto stabat, [Noctu in aqua stans psalterium recitat.] aqua repleuit; noctu abiecta tunica illud ingressus, ibi psalterium recitauit, rursusque egressus est: atque hoc tota vita sua factitabat. Cumque ita præclare pro æterna vita certasset, animam suam in manus Domini commendauit.

NOTATIO.

* Plures huius nominis ciuitates legere est apud Ortelium, Ptolemæum, & alios. Videtur hæc esse vel Seleucia aspera dicta, vrbs Metropolitana in Cilicia aspera, sub Antiocheno Patriarcha; vel Seleucia Pisidiæ in Pamphylia, & ipsa Metropolitana, sine vllo tamen suffraganeo; olim Antiocheno, deinde Constantinopolitano Patriarchæ subiecta. Seleuciam Pieriam arbitror tunc in Sarracenorum, cum vicina Antiochia, fuisse potestate.

** Mortuus est Leo IV. Copronymi filius anno Christi DCCLXXX. suscepitq; imperium Constantinus filius cum Irene matre, piissima femina.

*** Sic appellatur habitus religiosus. Ita Ioannes Moschus in Prato spirituali cap. 94. An nescis, Domine frater, quia habitum Angelicum fers? Eius tradendi ritum ex Græcorum Euchologio explicat Rosvveydus noster in Onomastico ad vitas PP.verbo Schema.

**** Stauratius a Nicephoro patre Imperij consors adlectus anno DCCCIII. anno deinde DCCCXI. in prælio contra Bulgaros, in quo Nicephorus interiit, multis affectus vulneribus, Imperio exutus a Proceribus est, subrogato Michaele Curopalate.

***** Tenuit imperium Michael a V. Octob. DCCCXI. vsque ad mensem Iulium anni DCCCXIII. Catholicus & piissimus Imperator, S. Ignatij Patriarchæ parens.

****** S. Nicephori Patriarchæ Constantinopolitani gesta dabimus XIII. Martij.

******* S. Mitchaelis Confessoris festum agitur XXIII. Maij. De hac legatione agit Baronius Tom. 9. Annal. ad annum DCCCXI. nu.18. & seqq. sed non recte Sinnaculorum Episcopum Michaelem vocat, qui Synnadorum siue Synnadon fuit. Misit per eum ad Leonem III. Papam S. Nicephorus Patriarcha litteras de sua electione, fidei suæ professionem, & munera. Extant eæ apud Baronium loco citato litteræ, in quibus Michaelem vocat Patriarcha sanctissimum Metrapoliten Sinnaculorum (imo Synnadon) Christo amabilis ciuitatis. Tum de eo hæc subdit: Erga vestram dilectionem valde ardenti & sincero amore afficitur, & in Ecclesiasticis rebus studiosum & alacrem se præbet; sicut & in sermone, & conuersatione, ac virtute ceteris antecellit. Exilij ærumnarumve fidei caussa toleratarum non meminit. Quare quod in Menæis hic Confessor appellatur, id dici videtur propter ea quæ paullo post sub Leone Armeno perpessus est. Nam quod in Menologio XXIII. Maij dicitur, quia Leonis Isaurici hæresim redargueret, in exilium missus, intelligendum est de hæresi a posteris propagata: vel Isaurici pro Armeni positum est. Quod Baronio occasionem præbuit scribendi ad annum DCCXXXIII. num. 2. eo tempore pulsum in exilium esse ab Isaurico Michaelem; quod anno demum DCCCXIV. contigit, vt ad eum annum num.32. scribit idem Baronius, licet restituat pro Synnadon, Sinnaculorum. Sed cui nota est Sinnacula Metropolis? Eiusdem Michaelis Synnadensis celebris est mentio in Nicæna II. Synodo, siue VII. Oecumenica, quæ anno Christi DCCLXXXVII. habita est. Plura nos de eo suo loco.

******** Synada siue Synnada vrbs est Phrygiæ Salutaris Metropolitana, vt videre est in Notitia Episcopatuum Autberti Miræi. Synnas quibusdam Latinis dicitur.

********* Erat is Leo III. qui anno DCCXCV. die XXVI. Decemb. creatus Pontifex, obiit XII. Iunij, anno DCCCXVI.

********** Est Acritas apud Ptolemæum Tab. I. Asiæ, Bithyniæ promontorium, ad initium Propontidis. In eo arbitror fuisse monasterium, ad quod S. Gregorium deduxit in Phrygiam reuertens Michael Episcopus: idemq; arbitror esse, cuius Hegumenus siue Præpositus Sisinnius reperitur VII. Synodo Oecumenicæ, siue Nicænæ II. subscripsisse Act. 4. licet isthic Ἡγούμενος Ἀρίτας dicatur, quod in Latina Conciliorum editione vertitur, Præses Aretes.

*********** Sub Leone Armeno præcipue, ad cuius extrema tempora, aut Michaelis Balbi initia (qui anno DCCCXX. ipso Christi natali Imperator est coronatus,) videtur Gregorius peruenisse.