Svb Diocl.

[Commentarius]

Multi sancti, Martyres Placentiae in Italia

[1] Philippvs Ferrarius in generali catalogo Sanctorum testatur, Placentie in Campo peregrinorum, vbi S. Mariæ de Campania ecclesia celebris est, Passionem hoc die recoli plurimorum Sanctorum Martyrum qui sub Giordano Præside, [Martyres Placentini sub Diocletiano.] Diocletiani & Maximiani persecutione, pro Christi fide interempti sunt. Quod se hausisse scribit ex antiquis illius Ecclesiæ monumentis, vrbisq; Placentinæ Annalibus.

[2] De his Martyribus ita scribit Franciscus Gonzaga historiæ Seraphicæ parte 2. in Prouincia Bononiæ, Conuent. XXV. agens de conuentu S. Mariæ de Campo Placentiæ: [Eorum corpora in puteum abiecta.] Est etiam hac in eadem ecclesia puteus quidam, in quo plura Sanctorum Martyrum corpora, ab impiis Christianæ religionis persecutoribus occisa, proiecta fuere: vnde & ad tempus quoddam oleum confouendis lampadibus commodissimum, [Inde oleum salutiferum scaturit.] atque diuersis fidelium infirmitatibus sanandis omnino mirificum, scaturiit: quod tamen humanæ auaritiæ demeritis id exigentibus, quæ in tantam dementiam proruperat, vt id, sumpto pretio, [Desinit fluere ob hominum auaritiā.] etiam curandis brutis animalibus applicaret, a plurimis diebus emanare cessauit omnino.