[Commentarius]

Circa An. CCIII.

Mavilus, Martyr Adrumeti in Africa (S.)

Ex variis.

Martyrologivm Romanum: Adrumeti in Africa, Commemoratio S. Mauili Martyris: qui in persecutione Seueri Imperatoris a Scapula sæuissimo Præside damnatus ad bestias, martyrij coronam accepit. De hoc Tertullianus lib. ad Scapulam c.3. Tibi quoque optamus admonitionem solam fuisse, quod cum Adrumeticum Mauilum (quidam codices Mauilium, vt monet Pamelius) ad bestias damnasses, & statim hæc vexatio subsecuta est, & nunc ex eadem causa interpellatio sanguinis: id est, vt Iacobus Pamelius, & Ioannes Ludouicus Lacerda noster, persecutio hoc principio excitata. At magis mihi Baronij arridet explicatio, qui clades Africæ intentatas significari ait, quasi iis sanguis interpellaretur, repetereturq;, iniuste profusus a Præside. Vide Baronium pluribus tom.2.an.203.num.5. & seqq.