Svb Diocletiano.

[Commentarius]

Sebastianus, Martyr ex legione Thebaea in Pedemontio (S.)
Alverius, Martyr ex legione Thebaea in Pedemontio (S.)

[1] De his sanctis Martyribus agit in historia Thebæa Guilielmus Baldesanus c.33. sub finem; ex quo, & Ecclesiæ Fossanensis in Pedemontana Liguriæ ditione monumentis, hæc scribit Philippus Ferrarius in catalogo Sanctorum Italiæ ad 2. Ianuarij:

[2] Aluerius & Sebastianus milites Thebæi, cum ex finibus Sedunorum, Maximiani Imperatoris persecutionem & crudelitatem in eos qui Christianam religionem colebant, [SS. Aluerius & Sebastianus vbi passi.] fugientes, in Taurinorum fines circa ea loca, vbi Fossanum ciuitas nunc est, se recepissent; ab Imperatoris satellitibus deprehensi, martyrio affecti sunt: quorum corpora in ecclesia Campestri, olim parochiali, apud Fossanum cum diu latuissent, [Eorum inuenta corpora 1427. 2.Ianuar.] anno salutis M.CCCC.XXVII.IV.NON. Ianuarij in arcis lapideis, cum inscriptione, quæ eos ex Thebæa legione fuisse, & sub memorato Imperatore passos esse, ostendit, vocum cælestium indicio reperta, & in basilicam dictæ ciuitatis maiorem translata, non mediocrem habent venerationem. Eorum meminit idem Ferrarius in generali catalogo Sanctorum.