Ex Martyrologiis.

[Commentarius]

Quintianus (S.)

Leontio Augustodunensi, nescio quem sanctum Quintianum subnecto, quoniam in aliquo Martyrologio sociatos inveni. In classicis locum non habet, quisquis demum fuerit is Quintianus, nisi inter classica Martyrologia numerari possit Barberinianum, in præfatione Usuardina citatum num. 36; in quo clare apparet prædicta conjunctio: Augstoduno, depositio Leontii Episcopi, & sancti Quintiani: non Quintiani Confessoris ut est in auctariis Bedæ a Papebrochio vulgati. Quid si enim duplicetur annuntiatio, positaque interpunctione post Episcopi, legatur: Et sancti Quintiani, qui Confessor, an Martyr sit, hactenus ignoretur? Certe codex Vaticanus, in præfatione Usuardina num. 44, scribit: Et sancti Quintiani Martyris: quique inter Usuardinos, solus de eo Sancto meminit, codex Victorinus, eamdem ipsi lauream tribuit: Eodem die, sancti Quintiani Martyris. Suspicetur aliquis, ex aliquo hujusmodi codice ultimam suam annuntiationem desumpisse Maurolycum: Item, sancti Quintiani Martyris. Ceterum uter titulus Quintiano conveniat, cujas fuerit, quando vixerit, quid gesserit, ubi, quando mortuus, aut Martyrio affectus sit, an peculiarem uspiam cultum habeat, an forte cum altero aliquo Quintiano vel I Aprilis, vel XIV aut XVI Junii confundendus, doceri cupio: hic ea solum causa post Leontium Augustodunensem collocatur, quod ita in præcitato Ms. Martyrologio Barberiniano conjuncti videantur.

Diese Seite ist ein Dokument und unterliegt nicht der inhaltlichen Gestaltung durch das Ökumenische Heiligenlexikon.
Wir werden Fehler deshalb nicht korrigieren.
Wir verantworten nur die Veröffentlichung.